22 avqust Zuğulba tədris idman bazasında 120 nəfər 13 yaşlı basketbolçu arasından seçilmiş 30 basketbolçu arasında milli komanda üçün seçim prosesinə start verilib. Seçim prosesinə Azərbaycan Basketbol Federasiyasının (ABF) uşaq basketbolu üzrə baş koordinatoru serbiyalı mütəxəssis Milan Kotoraç rəhbərlik edir. Seçim zamanı serbiyalı mütəxəssis və digər yerli məşqçilərimiz tərəfindən basketbolçuların texniki bacarıqları, taktiki düşüncə qabiliyyəti və fiziki hazırlıq səviyyəsi dəyərləndirilir. Baxış mərhələsinin əsas məqsədi gələcəkdə milli komandanı təmsil edə biləcək istedadlı oyunçuların müəyyənləşdirilməsi və onların inkişaf potensialının qiymətləndirilməsidir.

 Qeyd edək ki, seçim mərhələsi 31 avqustda yekunlaşacaq.

 Azərbaycan basketbolunun tanınmış simalarından biri, beynəlxalq dərəcəli hakim Ələkbər Həsənov FİBA bayrağı altında keçirilən yarışlarda son oyununa çıxır. Təcrübəli hakimimiz Gürcüstanda təşkil olunan 16 yaşadək oğlanlar arasında Avropa Çempionatında Sloveniya və İtaliya yığmaları arasında keçiriləcək bürünc medal uğrunda matçı idarə edəcək. Bu oyun Ələkbər Həsənovun beynəlxalq arenada baş hakim kimi son matçı olacaq və onun uzun illər davam edən uğurlu beynəlxalq karyerasının simvolik yekunu kimi tarixə düşəcək. Ələkbər Həsənov 2010-cu ildən etibarən FİBA-nın təşkil etdiyi beynəlxalq yarışlarda ədaləti qoruyub. 15 il ərzində o, Avropa çempionatlarının müxtəlif yaş kateqoriyalarında, beynəlxalq turnirlərdə və klublararası yarışlarda Azərbaycan basketbolunu layiqincə təmsil edib. Bu yarışlar arasında qadınların Avroliqa finalı, Avropa Çempionatlarının müxtəlif divizionlarında final görüşləri və Olimpiya Festivalının final qarşılaşması olub. Beynəlxalq karyerasına yekun vuran Həsənov basketbola bağlılığını davam etdirəcək. O, bundan sonra Azərbaycan Basketbol Liqasında (ABL) oyunları idarə etməklə yanaşı, gənc hakimlərin yetişməsinə dəstək olacaq. FİBA-nın gələcək yarışlarında isə o, artıq instruktor kimi fəaliyyət göstərəcək və öz təcrübəsini yeni nəsil hakimlərə ötürəcək. Ələkbər Həsənovun illərdir göstərdiyi xidmətlər Azərbaycan basketbol hakimliyinin inkişafın etməsində önəmli rol oynayıb. Onun adı hər zaman Azərbaycan hakimliyinin beynəlxalq arenada etibarlı siması kimi yadda qalacaq.

 Azərbaycan Basketbol Federasiyası (ABF) adından Ələkbər Həsənova gələcək fəaliyyətində uğurlar arzulayırıq !

 27 iyul 3x3 basketbol üzrə qadın millimiz Qadın Seriyasında Sumqayıt mərhələsinin final oyununa çıxıb. Qızlarımız Latviya yığmasına 15:12 hesabı ilə qalib gəlib və doğma azarkeşlər önündə hamıdan güclü olaraq çempion ünvanına yiyələnib. Sumqayıt mərhələsinin ən dəyərli oyunçusu (MVP) millimizin üzvü Aleksandra Mollenhauer seçilib. Qeyd edək ki, millimiz keçirdiyi bütün oyunlarda rəqiblərinə qalib gəlib. Yarışın sonunda, Arika Karter, Aleksandra Mollenhauer, Brianna Freyzer və Dina Ulyanovadan ibarət olan millimizin heyət üzvləri çempionluğu bayram edib və xatirə şəkilləri çəkdiriblər.