Azərbaycan basketbolu adına ən ciddi tapşırıq yerli simalara həvalə olundu

  2023 -cü il 6 dekabr tarixindən federasiya rəhbərliyinin qəbul etdiyi yekun qərara əsasən, kişilərdən ibarət yığma komandamıza yeni məşqçilər korpusu təyin olunub. Belə ki, millimizdə əsas qərarı verəcək mütəxəssislər Azərbaycan basketbol ictimaiyətinə heç də, yad simalar deyil. Uzun illər Azərbaycan basketboluna yığma və klub səviyyəsində həm oyunçu, həm də məşqçi kimi xidmət göstərmiş Tahir Baxşıyev və Anar Sarıyev, bundan sonra həmin xidmətin davamını əsas yığmamızda gətirməyə çalışacaqlar. Belə ki, hal-hazırda "NTD-İNDİQO" klubunun baş məşqçisi kimi fəaliyyət göstərən Tahir Baxşıyev millinin baş məşqçi postuna, "Neftçi" klubunun baş məşqçisi Anar Sarıyev isə birinci köməkçi məşqçi vəzifəsində təyin olunmuşdur. Bundan əlavə, yığmamızın məşqçilər korpusunda ispaniyalı mütəxəssis Alberto Blanko da yer alacaq. Sonuncu iş yeri İspaniyanın ikinci liqasında (LEB GOLD Spain) çıxış edən "Kaseres" klubunun əsas meneceri və idman direktoru olan Alberto Blanko, yığmamızda ikinci köməkçi məşqçi kimi çalışacaq. Avropa basketbolunu yaxından tanıyan 53 yaşlı mütəxəssisin əsas vəzifələrindən biri rəqib komandaların oyunçularını dərindən təhlil etmək və yerli məşqçilərimizlə birlikdə onlara qarşı əks həmlələr hazırlamaq olacaq. Qeyd edək ki, millimizin ilk sınağı 2027-ci il Qətərdə keçiriləcək Dünya çempionatının ilkin təsnifat mərhələsinin oyunları çərçivəsində, 22 fevral İsveçrə yığmasına qarşı oyun olacaq