Azərbaycan Basketbol Liqasında (ABL) PLAY-OFF seriyalarına start verilib

 25 iyul oğlanlardan ibarət U-18 millimiz Xorvatiyanın Riyeka və Opatiya şəhərlərində keçirilən Avropa çempionatı B divizionunda ikinci qrup oyununu Ukrayna seçməsinə qarşı keçirib. Millimiz oyunun ilk hissəsində rəqibə məğlub olsa da, ikinci hissədə geridönüş edərək 77:68 hesablı qələbə qazanıb. Görüşün ən dəyərli basketbolçusu (MVP) 20 xal, 17 ribaundla millimizin üzvü Emanuel Aqbason seçilib. Bu qələbə U-18 millimizin Avropa çempionatı B divizinionunda qazandığı ilk qrup qələbəsi kimi də tarixə düşüb.

 Qeyd edək ki, yığmamız qrupda növbəti oyununu 26 iyul Bakı vaxtı ilə saat 12:30-da İslandiya seçməsinə qarşı keçirəcək.

 20 yaşa qədər oğlanlar arasında keçirilən Avropa çempionatı B divizionun oyunları yekunlaşıb. Slovakiyanın paytaxtı Bratislava şəhərində təşkil olunan yarışda Anar Sarıyevin rəhbərlik etdiyi U-20 milli komandamız son oyununu Niderland seçməsinə qarşı keçirib və 66:60 hesabı ilə rəqibinə qalib gəlib. Avropa çempionatı B divizionunda iştirak edən 21 komanda arasında yaş ortalamasına görə 3 ən gənc kollektivdən biri olan millimiz, çempionatı 11-ci pillədə başa vurub. Bu nəticə Azərbaycan basketbol tarixində bir ilk kimi də statistikaya düşüb. İlk baxışda yarışın tam mərkəzində qərarlaşmaq adi bir nəticə kimi görünsə də, komandamızın yer aldığı qrupun ağırlığı və rəqiblərin səviyyəsi bu nəticənin adi bir nəticə olmadığını göstərir. Bunu qrup mərhələsində qarşılaşdığımız komandaların çempionatın sonundakı yekun mövqeləri də aydın sübut edir. Belə ki, qrupdakı ən güclü rəqibimiz olan İsveç millisi çempionatın bürünc medallarına sahib çıxıb. Digər rəqibimiz İrlandiya komandası pley-off mərhələsini uğurla keçərək yarışın 5-cisi olub. Şimali Makedoniya yığması isə ilk onluqda qərarlaşaraq çempionatı 9-cu sırada bitirib. Millimiz çempionat boyu göstərdiyi əzmkar oyun sayəsində ümumi sıralamada düz 10 ölkəni geridə qoymağı bacarıb. Basketbolçularımız turnir cədvəlində Niderland, İsveçrə, Kipr, Gürcüstan, Danimarka, Estoniya, Slovakiya, Ermənistan, Albaniya və Kosovo kimi komandaları üstəliyə bilib. ​Belə bir gərgin rəqabət mühitində qazanılan 11-ci yer gənc basketbolçularımız üçün həm böyük beynəlxalq təcrübə, həm də gələcək turnirlərdə daha böyük uğurlar qazanmaq üçün möhkəm bir bünövrə deməkdir.

 12 iyul oğlanlardan ibarət U-20 millimiz Slovakiyanın paytaxtı Bratislava şəhərində keçirilən Avropa çempionatı B divizionunda ikinci qrup oyununu keçirib. Basketbolçularımız ev sahibi Slovakiya seçməsi ilə gərgin oyunun yekununda 72:66 hesablı qələbə qazanıb. Görüşün ən məhsuldar oyunçusu 26 xal, 16 ribaundla millimizin üzvü Emanuel Aqbason seçilib.

 Qeyd edək ki, yığmamız qrupda növbəti oyununu 14 iyul Bakı vaxtı ilə saat 22:30-da İrlandiyaya qarşı keçirəcək.