"AAAF Xırdalan" basketbolçuları vacib qələbə qazandılar

Bu gün Latviyanın paytaxtı Riqa şəhərində 2029-cu ildə baş tutacaq basketbol üzrə Avropa Çempionatının (EuroBasket 2029) ilkin təsnifat mərhələsinin (Pre-Qualifiers) püşkatma mərasimi keçirilib. Püşkün nəticəsinə əsasən, kişilərdən ibarət milli komandamız A qrupunda Şimali Makedoniya, Lüksemburq və İrlandiya ilə mübarizə aparacaq. İlkin təsnifat oyunları noyabr ayında baş tutacaq. Turnirin reqlamentinə görə, qruplarda komandalar ev və səfər prinsipi ilə dairəvi sistem üzrə oyunlar keçirəcəklər. A qrupunda 4 komanda olduğuna görə, millimiz ümumilikdə 6 qarşılaşmada qüvvəsini sınayacaq.

 Qeyd edək ki, növbəti mərhələyə qrup qalibləri ilə yanaşı, FIBA-nın ümumi reqlamentinə əsasən qrupda ən yaxşı ikinci yeri tutmuş bir komanda da vəsiqə qazanacaq. Məlumat üçün bildirək ki, millimizin yer aldığı qrupda xüsusi qayda tətbiq olunacaq. Belə ki, 4 komandalı qruplarda ən yaxşı ikinci yeri müəyyən edərkən sonuncu pillədə qərarlaşan komanda ilə keçirilmiş oyunların nəticələri hesabata daxil edilməyəcək.

 5-7 sentyabr tarixlərində Danimarkanın paytaxtı Kopenhagendə qadınlardan ibarət millimizin də iştirak etdiyi 3x3 basketbol üzrə Avropa Kubokunun oyunları baş tutub. Turnirin qrup mərhələsində qadın millimiz ilk oyunda Fransaya 21:16, ikinci oyunda isə Ukrayna seçməsinə 21:14 hesabları ilə qalib gələrək, qrup lideri kimi 1/4 finala vəsiqə qazanıb. Millimiz 1/4 finalda Polşa yığmasını 16:13 hesabı ilə məğlub etdikdən sonra, yarımfinalda son Avropa çempionu İspaniya üzərində 21:17 hesablı qələbə qazanaraq 3x3 basketbol tariximizdə ilk dəfə olaraq finala vəsiqəni təmin edib. Həlledici görüşdə millimiz son dünya çempionu Niderland yığması ilə qarşılaşıb və güclü rəqibinə 16:21 hesabı ilə məğlub olaraq Avropa Çempionatının gümüş mükafatçısı olub.

 Qızlarımızın Avropa səhnəsində göstərdiyi bu tarixi zəfər ölkə basketbolu adına önəmli bir uğurdur. Qızlarımızı ürəkdən təbrik edir, gələcək yarışlarda uğurlar arzu edirik.

 Azərbaycan Basketbol Liqasında (ABL) 2025/26-cı illər mövsümünə 28 sentyabrdan start veriləcək. Reqlamentə əsasən, çempionatın oyunları dörd dövrəli, 20 turdan ibarət sistem üzrə keçiriləcək. Müntəzəm mövsümün oyunları "A" və "B" qrupları üzərindən baş tutacaq. Ötən mövsümdə göstərdikləri yekun nəticələrə əsasən, klubların mübarizə aparacaqları qruplar aşağıdakı kimidir:

A qrupu: "Sabah" BK, "Neftçi" İK, "Şəki" BK, "Abşeron Lions" BK, NTD BK, "Gəncə" BK

B qrupu: "Naxçıvan" BK, "Ordu" İK, "Sərhədçi" PİK, "Sumqayıt" BK, "Quba" BK, "Lənkəran" BK

 Müntəzəm çempionatın "A" qrupunun oyunlarında meydançada 4 əcnəbi və mütləq şəkildə 1 yerli basketbolçunun iştirak etməsi əsas şərt olacaq. "B" qrupunun oyunlarında isə 15-ci tur daxil olmaqla 3 əcnəbi və 2 yerli basketbolçu, 16-cı turdan etibarən isə 4 əcnəbi və 1 yerli basketbolçunun parketdə olması mütləqdir. Müntəzəm mövsümdə "A" qrupunu ilk 3 sırada tamamlamış klublarla yanaşı, "B" qrupunu lider bitirmiş komanda pley-off'un 1/4 final mərhələsinə vəsiqə qazanacaq. "A" və "B" qruplarında digər yerləri tutmuş komandalar isə pley-offun 1/8 final mərhələsində üz-üzə gələcəklər. 1/8 finalda ən tez iki qələbə qazanmış klublar 1/4 finala vəsiqə əldə edəcəklər. Həm 1/4 final, həm də yarımfinal seriyaları 2 qələbəyə qədər davam edəcək. Final seriyasında isə ən tez 3 qələbə qazanmış klub Azərbaycan Basketbol Liqasının (ABL) çempionu olacaq.

 Qeyd edək ki, çempionatın yekun nəticələrinə əsasən, mövsümü sıralamada ilk 8-likdə tamamlamış klublar növbəti mövsümdən 1-ci liqada (ABL), 9–12-ci yerləri tutmuş klublar isə ölkə basketbolunda ilk dəfə olaraq təşkil olunacaq ikinci liqada (ABL 2) mübarizə aparacaqlar.