Tələbələr arasında basketbol üzrə ölkə birinciliyi

 11 və 14 noyabr tarixlərində qadınlardan ibarət milli komandamız final mərhələsi 2029-ci ildə baş tutacaq Avropa çempionatının (Eurobasket 2029) ilkin təsnifat mərhələsində iki qrup oyunu keçirib. Millimiz, Milli Gimnastika Arenasında keçirilmiş ilk qrup oyununda İsveçrə yığmasına 33:84, ikinci qrup oyununda isə İrlandiya seçməsinə 73:91 hesabları ilə məğlub olub. Bu oyunlar yunanıstanlı baş məşqçi İoannis Diamantakos 'un milli komandamızın heyətində debüt oyunları olub.

 Qeyd edək ki, milli komandamız qrupda növbəti oyununu 17 noyabr Bakı vaxtı ilə saat 23:30-da səfərdə İslandiya yığmasına qarşı keçirəcək.

 6-8 noyabr tarixlərində Azərbaycan Basketbol Liqasında (ABL) 6-cı turun görüşləri keçirilib. ABL-in altıncı turunda baş tutmuş oyunlarda aşağıdakı hesablar qeydə alınıb.

"Ordu" - "Sabah" (81:93)

"Neftçi" - NTD (82:63)

"Gəncə" - "Sumqayıt" (76:80)

"Naxçıvan" - "Landau Lions" (63:59) ​

 Qeyd edək ki, 8 Noyabr – Zəfər Gününə təsadüf edən turun son iki qarşılaşmasından – Milli Gimnastika Arenasında keçirilən "Naxçıvan" – "Landau Lions" və Gəncə İdman Sarayındakı "Gəncə" – "Sumqayıt" oyunlarından öncə ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. ABL-də yoluna məğlubiyyətsiz davam edən "Neftçi" klubu çempionatın vahid lideridir. NTD klubu isə turnir cədvəlində sonuncu pillədə qərarlaşıb.

 ​Ölkəmizdə basketbol həyəcanını daha yaxından hiss etmək və klublarımıza dəstək olmaq istəyən azarkeşlər üçün müxtəlif imtiyazları və geniş qiymət aralığını əhatə edən 4 fərqli üzvlük paketi təqdim olunur: ​

Bronze: Bütün oyunlar üçün 119 AZN, seçilmiş bir klubun oyunları üçün 92 AZN. Paketə sadə bilet, rəsmi şərf və açarlıq daxildir. ​

Silver: Bütün oyunlar üçün 299 AZN, seçilmiş bir klubun oyunları üçün 199 AZN. Paket VIP bilet, klubun rəsmi forması və fan-şopda 5% endirim imkanı təklif edir. ​Gold: Bütün oyunlar üçün 992 AZN, seçilmiş bir klubun oyunları üçün 719 AZN. Bu paketin sahibləri VIP bilet, VIP Box şəraitindən istifadə hüququ və fan-şopda 20% endirim əldə edirlər. ​

Family & Friends: Bütün oyunlar üçün 292 AZN, seçilmiş bir klubun oyunları üçün 192 AZN. Valideynlər, uşaqlar və dostlar üçün nəzərdə tutulan bu paketə sadə biletlərlə yanaşı, xüsusi "Mənim ilk oyunum" hədiyyə qutusu daxildir. ​

 Qeyd edək ki, azarkeşlər üzvlük paketlərini Azərbaycan Basketbol Federasiyasının (ABF) rəsmi internet səhifəsi və "ABF" mobil tətbiqi vasitəsilə onlayn qaydada, eləcə də oyun günlərində Bakı İdman Sarayının bilet kassalarından əldə edə bilərlər.