Azərbaycan Kubokunun qalibi NTD basketbolçularıdır

 30 mart Bakı İdman Sarayında basketbol üzrə Azərbaycan Kubokunda final oyunu baş tutub. NTD və "Gəncə" klubları arasında keçirilən final oyununa region təmsilçisi daha fəal başlayıb və ilk hissəni 44-40 hesabı ilə qalib bitirib. Oyunun 3-cü dövrəsindən etibarən üstünlüyü ələ keçirən NTD klubu görüşü 81-72 hesabı ilə qalib tamamlayıb və kubokun sahibi olub. Finalın ən dəyərli basketbolçusu (MVP) NTD-nin müdafiəçisi Detrek Brauninq seçilib.

 28 mart Bakı İdman Sarayında basketbol üzrə Azərbaycan Kubokunda yarımfinal oyunları baş tutub. Günün birinci yarımfinal oyununda NTD klubu 86-83 hesabı ilə "Neftçi"yə qalib gələrək ilk finalçı olub. İkinci yarımfinal görüşündə isə region təmsilçiləri üz-üzə gəliblər. Oyuna fəal başlayan "Gəncə" basketbolçuları 86-80 hesabı ilə "Naxçıvan" üzərində qələbə qazanaraq ikinci yarımfinalçı olublar. Qeyd edək ki, NTD-"Gəncə" final oyunu 30 mart Bakı İdman Sarayında keçiriləcək.

 17,18 və 19 mart tarixlərində Azərbaycan Basketbol Liqasında (ABL) 19-cu turun oyunları keçirilib. Turun açılış oyununda "Sumqayıt" doğma divarlar arasında 112-103 hesabı ilə "Quba"nı üstələyib. "B" qrupunun növbəti oyununda "Ordu" 87-65 hesabı ilə "Lənkəran"a qalib gəlib. Həmin qrupda mərkəzi və həlledici oyun isə "Şəki" və "Gəncə" klubları arasında oynanılıb. Əlavə vaxta gedən oyunda "Şəki" 91-87 hesablı qələbə qazanaraq, "B" qrupunun vahid lideri olub. "A" qrupunda "Naxçıvan" 58-60 hesabı ilə "Abşeron"a məğlub olub. "Sərhədçi" İdman Mərkəzində keçirilmiş NTD-"Sabah" (79-105) və "Sərhədçi"-"Neftçi" (70-84) oyunları ilə 19-cu tura yekun vurulub. Geridə qalmış 19 turdan sonra, "A" qrupunun vahid lideri "Sabah" klubudur. "Naxçıvan" ikinci, "Neftçi" isə 3-cü pillənin sahibidir. "B" qrupunun vahid lideri "Şəki" klubudur. "Gəncə" ikinci, "Ordu" isə 3-cü sırada qərarlaşıb. Qeyd edək ki, "A" qrupunda "Sabah", "Naxçıvan" və "Neftçi" klubları birbaşa pley-off mərhələsinə vəsiqəni təmin ediblər. "B" qrupunda isə pley-off mərhələsinə birbaşa vəsiqə qazanacaq klubun adına son turdan sonra aydınlıq gələcək.