Basketbol üzrə U-18 milli komandamız Avropa Çempionatında qrupda ikinci qələbəsini qazandı.

 29 sentyabr “Four Seasons” otelində Azərbaycan Basketbol Federasiyasının (ABF) 2026/27 mövsümünün başlanması və ötən mövsümün hesabatına həsr olunmuş tədbir baş tutub. Tədbirdə Milli Olimpiya Komitəsinin vitse-prezidenti Çingiz Hüseynzadə, Azərbaycan Gənclər və İdman Nazirliyinin İdman şöbəsinin müdiri Elnur Məmmədov, Azərbaycan Respublikası Elm və Təhsil Nazirinin müavini Firudin Qurbanov, Azərbaycan Basketbol Federasiyasının prezidenti Emin Əmrullayev, federasiyanın rəyasət heyətinin üzvləri, universitet rektorları, rəsmi tərəfdaşlar, federasiya əməkdaşları, klub rəhbərləri, məşqçilər, basketbolçular və media nümayəndələri iştirak ediblər.

 İlk olaraq federasiyanın mətbuat katibi Sənan Əliyev son mövsümün hesabatını təqdim edib. O, federasiyanın ötən mövsümdə həyata keçirdiyi layihələr, beynəlxalq turnirlərdə qazanılan uğurlar və yaxın gələcəkdə planlaşdırılan yeniliklər barədə ətraflı məlumat verib. Daha sonra isə açılış nitqi ilə çıxış edən MOK-un vitse-prezidenti Çingiz Hüseynzadə ölkəmizdə basketbolun inkişaf istiqamətləri və bu sahədə atılan addımlardan bəhs edib. O, Azərbaycan basketbolunun milli və klub səviyyəsində beynəlxalq müstəvidə böyüyən uğurlarından da söz açıb.

 ABF prezidenti Emin Əmrullayev çıxışında federasiyanın fəaliyyət prinsiplərinə toxunub və yerli çempionatın daha da rəqabətli olmasından danışıb: “Basketbolun ölkəmizdə kütləviləşməsi və klubların dayanıqlı inkişafı bizim üçün əsas prioritetdir. Basketbol Federasiyası olaraq davamlı nəticə əldə etmək üçün ikirəqəmli müddət gərəkdir. Biz harada qısa müddətdə uğur qazanmaq imkanımızın olduğunu yaxşı anlayırıq. 3x3 qadın basketbolu buna əsas nümunədir. ABL-də iştirak edən 4 klubun Avrokuboklarda mübarizə aparmasını da nəzərə alsaq, 8 klublu bu çempionat ötən mövsümlərlə müqayisədə daha da rəqabətli olacaq.”

 Tədbirin sonunda federasiya prezidenti Emin Əmrullayev federasiyanın rəsmi tərəfdaşlarına xüsusi hədiyyələr təqdim edib. Bundan əlavə mövsüm ərzində fəaliyyət göstərən meydan hakimləri oyunların ədalətli və peşəkar idarə olunmasına, masa hakimləri isə oyunların texniki nəticələrinin dəqiq qeydiyyatına görə təltif ediliblər. Ardınca media nümayəndələri üçün brifinq təşkil olunub. Jurnalistlərin suallarını cavablandıran federasiya rəhbəri yeni mövsümün basketbol ictimaiyyəti üçün daha da maraqlı olacağına inandığını bildirib.

 Azərbaycan Basketbol Liqasının (ABL) 2026/2027 mövsümündə iştirak edəcək klubların siyahısında dəyişiklik edilmişdir. ABL və ölkə kubokunun keçirilməsi haqqında əsasnamənin 3.3 və 5.12-ci maddələrinə əsasən, klubların qeydiyyat tələblərinin yerinə yetirilməsi ilə bağlı aparılan qiymətləndirmənin nəticəsində ABL idarə heyəti tərəfindən müvafiq qərar qəbul edilmişdir. Qərara əsasən, 2026/2027 mövsümündə “Sumqayıt” BK ABL-də, “Şəki” BK isə ABL2-də iştirak edəcək. Beləliklə, 2026/2027 mövsümündə ABL-də iştirak edəcək 8 klubun yekun siyahısı aşağıdakı kimidir:

“Sabah” BK

“LANDAU Lions”

“Gəncə” BK

“Neftçi” İK

“Ordu” İK

“Naxçıvan” BK

 NTD BK

“Sumqayıt” BK

 Qeyd edək ki, ABL-də 2026/2027 mövsümünə “Sabah” - “LANDAU Lions” oyunu ilə start veriləcək. Açılış oyunu 30 sentyabr saat 19:30-da Bakı İdman Sarayında baş tutacaq.

 11-13 sentyabr qadınlardan ibarət 3x3 milli komandamız Belçikanın Antverpen şəhərində keçirilən Avropa Çempionatında iştirak edib. Millimiz ilk qrup oyununda Niderlanda 12:21 hesabı ilə məğlub olsa da, ikinci görüşündə Ukrayna seçməsinə 20:7 hesabı ilə qalib gəlib və 1/4 finala yüksəlib. Millimiz 1/4 finalda Fransanı 20:15 hesabı ilə məğlub edərək yarımfinalda İspaniya seçməsinə rəqib olub. Qızlarımız yarımfinalda İspaniyaya 16:20 hesabı ilə məğlub olsalar da, 3-cü yer uğrunda görüşdə Sloveniya üzərində 21:18 hesablı qələbə bizi Avropa Çempionatında ən güclü 3-cü komanda edib.

 Qeyd edək ki, bu nəticə ilə 3x3 basketbol üzrə qadınlardan ibarət millimiz ardıcıl ikinci dəfə Avropa Çempionatında mükafatçılar arasında yer alıb.